Сёння ў “Настаўніцкай газеты” Дзень нараджэння! Адному са старэйшых педагагічных выданняў – 76 гадоў.
20.12.2021Станаўленне выдання адбывалася ва ўмовах пасляваеннага разбурэння. Перад грамадствам тады стаяла вострая неабходнасць аднаўлення народнай адукацыі. Развіццё школ, тэхнікумаў, вучылішч і ВНУ краіны пасля акупацыі было ўскладнена тым, што цалкам былі знішчаны падручнікі, навуковыя дапаможнікі, метадычная літаратура для выкладчыкаў.
Усё гэта выявіла неабходнасць стварыць адзіную платформу, якая аб’ядноўвала бы перадавы вопыт пасляваеннага часу. Такой метадычнай базай у 1945 годзе і стала “Настаўніцкая газета”. Аднымі з першым рубрык сталі “Метадычная старонка” і “У дапамогу настаўніку”.
Прайшло шмат часу, але “Настаўніцкая газета” па-ранейшаму з’яўляецца платформай для аб’яднання перадавога педагагічнага вопыту. Мы імкнёмся адпавядаць часу, прыслухоўваючыся да прафесійных патрэб настаўнікаў. І мы вельмі ўдзячны нашым падпісчыкам і аўтарам за падтрымку і сумесную рэалізацыю мноства праектаў.
Спадзяёмся, што і 2022 год прынясе нямала цікавых сустрэч з вамі, паважаныя сябры!