Роднае слова, табой я багаты...

Мерапрыемства прайшло ў класе-музеі паэта, што размяшчаецца ў школе. Падрыхтавалі і правялі літаратурныя чытанні Таццяна Захарыч, дырэктар эстэтычнага цэнтра выхавання, былая вучаніца Івана Лашуткі, і дачка паэта Лілія Твярдоўская, настаўніца гэтай школы. На сустрэчу прыйшлі вучні шостых і другіх класаў, супрацоўнікі раённай бібліятэкі імя Ганны Новік, людзі, якія любяць і памятаюць паэта.

Светла-журботная і такая блізкая сэрцу мелодыя песні «Край верасовы», якую на словы Івана Лашуткі напісаў вілейскі кампазітар Аляксандр Высоцкі, адкрыла сустрэчу, запрасіла да размовы. Прысутных вітала Таццяна Захарыч, якая пазнаёміла ўсіх з новым дыскам «Барвовае лісце», выпушчаным нядаўна калектывам аўтарскай песні «Элегія». На ім ёсць і песні на словы Івана Лашуткі. Дыскі Таццяна Мікалаеўна ўручыла на сустрэчы людзям, з якімі яе звязвае творчая дзейнасць. А затым у зале гучалі вершы паэта.

Пра роднае слова і бацькаўшчыну, сумленне і справядлівасць, жыццёвыя каштоўнасці і духоўнасць, памяць і ўсеабдымную любоў пісаў паэт свае творы. I пра нашу змену, дзяцей, якіх вельмі любіў. Гэта да іх звяртаўся ён такімі радкамі:

Вы – мае найвышэйшыя суддзі,

Вы – мае абаронцы надзей.

Найчасцей бы, дарослыя людзі,

Справядлівасць шукаць – у дзяцей.

Менавіта яны, дзеці, былі галоўнымі гасцямі і ўдзельнікамі літаратурных чытанняў. Іх вуснамі гаварыў у гэты дзень паэт, з іх вуснаў гучала высокае, мудрае, справядлівае і такое роднае беларускае слова.